Thursday 3 March 2011

Untukmu Ibu

Setitik air susu..
Yang masuk ke mulut
Besa hajak ibu
Nok tengok ku hidup

Air susu ibu
Nilai tak dok ghego
Walau pitih beghibu
Denga duit sejuto..

Ku tengok muko ibu
Sejak mudo sapa tuo
Dahi keduk seghibu
Ube putih penuh palo

Tapi aku tahu
Ibu banyok jaso
Air tange ibu
Seghibu bau seghibu ghaso

Oh ibu..Oh ibu
Teghima kasih ibu..

Sejak kecik hingga aku dewasa
Nyamok seko tok wi ketik mu duk jago
Make minum kain baju tok wi kughe
Didik aku denga penuh kasih saye

Bilo besa baghu aku kenal dighi
Tak dok nilai jaso ibu tabur budi
Tange poho kaki
Sanggup jadi jambe
Ghelo susoh dighi
Pegho aku soghe

Ibu yang hok tuo
Duk peghati anok-anok
Hok dio tabur sajo
Bilo besar dio nok tengok

Anok yang berjayo
Di taghuh haghape
Bekal haghi tuo
Tepak dio nok menumpe

Oh ibu..oh ibu..
Jasa mu ku kene..

Selamo keni ibu duduk jadi hambo
Haghi ini ku nok balas segalo jaso
Sakit deme, make minum mu ku jago
Nok wi sene hidupmu di maso tuo
Jaso baik budi ibu ku tok lupo
Walau setitik air susu mu ku ghaso

Nok buleh ku soghe
Mu ngadung semile bule
Letih penat badey
Mu tok oyak ko ore

Ku cium tange ibu
Mitok halal mitok ampun
Segala saloh aku
Banyok sangat kalu hitung

Haghi ni aku tahu
Nilai kasih ibu kandung
Budi dan jasa ibu
Setinggi-tinggi aku sanjung..

Pado anok-anok
Hok masih ado ibu
Tolonglah pakak tengok
Walau sekali saghi seminggu

Hagheto dio tak nok
Haghak kasih anok cucu
Tengok mato anok
Teghubaklah segalo rindu

Oh ibu..ob ibu
Ku saye pada mu

Oh ibu
Halallah make dan minum ku

Oh ibu..oh ibu
Ampunkan dosaku

Oh ibu..oh ibu
Teghimo kasih ibu..

2 comments: